السلام عليكم
من عدة ايام وانا اخطط لكتابه موضوع عن الالعاب الشعبيه(الي جنه نلعبهة بالشارع) لان كبل ما جان عدنه اتاري لو بلي ستيشن لو كومبيوتر
الحاصل نرجع لموضوعنه
جمعت افكاري والي باقي بذاكرتي واستعانيت بعدد من الاشخاص ليتذكروا معي بعض الالعاب مع العلم ان اسماء الالعاب تختلف من محافظه الى اخرى
ف راح اكتب اللعب الي اتذكرتهة واملي بكم ان تكملوهة لان هذا تراث حلو وحرامات ينسي وبيوم من الايام راح تخبر ابنك عنها ليعلم كيف كانت وسائل الترفيه بزمن والديه واجداده
1- الدعبل وماتزال موجوده (الكل جان يدافعلي كبل لأن بس اخسر وياخذون دعابلي جنت محبوب)
2- سبع سيفونات :تجيبون 7 سيفونات خاف واحد مايعرف(غطاء بطل الببسي) وتخلونهن
واحدة فوك الاخرى وتبتعدون مسافه وبيدكم طوبه ولازم توكع السيفونات ومن توكعهن لازم تشرد وماتخلي الفريق الاخر يمسكون بيك
3- يدة وحاح او (بلبل حاح) عند اهل بغداد:ويمكن اكو الهة غير اسم ماادري وهي عباره عن قطعه صغيرة من الخشب واخرى كبيرة(عودة كصيرة وعودة طويله) وتضرب العودة الزغيرة وتطيرهة (مااعرف قواعد اللعبه الي يعرفهة يكتبهة )
4- لعبه مااعرف اسمها :وهي يخططون الولد الكاع بالماي مثل الملعب ويكفون عالاركان
ارجو ان تكملوهة
5-صناعه الطيارات الورقيه: لازم كل الولد يعرفون يسوون طيارات ويتم التنافس على العلو من تطير وطول الذيل
5- الركيضان :وهذه لعبه معروفه للجميع
6- غميضان او الختيلان:واحد يغمض ويحسب للعشرة لو اكثر والباقي يختلون وهو يبحث عنهم الى ان يلكاهم والي يلكونه اول شي هوة يروح يغمض وتستمر اللعبه
7-النواعير ومفردها ناعورة او مصراع : وهسه ماكو ناعورة ابشركم صار (بي بليد)
8- لعبه الصور او التصاوير :تلعب بشراء طبقه من صور اللاعبين لو صور افلام الكارتون لو الجهال الي حالتهم الماديه مو خوش يلعبون بصور غلاف الشخاطه وهسه بالوقت الحاضر صارت لعبه (يوغي )
9- لعبه الجرخ :وهو عجله صغيرة مال بايسكل صغير او عربه صغيرة ويربطوه بسيم قوي او لعبه التايرات (كل والد عندة تاير مال سيارة ويتسابقون بيه بالشارع)
وهذني اللعب اعلاه للولد اغلبهة وبيهن العاب مشتركه بين الولد والبنات
بس اكو العاب خاصه بالبنات مثل
1- التوكي او (محلقو عند اهل الناصريه): وماكو واحد مايعرف التوكي ابو خمسه وابو ثمانيه وابو تسعه هذا اصعب واحد
2- لعبه الحبل :البنات يحبونهة ومشهورة ولحد الان تنلعب
3- بيت البيوت او (بيت بيوتي-عند اهل بغداد):البنات يتفنن بهاي اللعبه كل وحدة تجيب لعابتهة وعبايتهة ومجموعه من الادوات المنزليه ويلعبن مرة خطار مرة صديقات مرة ام وبناتهة وهكذا
4- لعبه تضع فيها البنات رجليهن على بايه الدرج والاخرى على الارض بس مااعرف شسمها واكو بيهة اغنيه الي تذكرهة من البنات تكتبهة
اكو لعبات بيهة اغاني مثل
1- شدة يا ورد شدة
2- الثعلب فات فات
3- حجنجلي بجنجلي صعدت فوق الجبل: يجلس الاطفال منتجين على الحائط ويمدون ارجلهم ويرددون هذه الاغنيه واخير كلمه من الاغنيه اين تقف يرفع الواحد رجله
واكيد اكو بعد بس مااتذكر
ارجو ان ينال اعجابكم تقريري البسيط والله تعبت بيه هواي
بس ماكو تعب لخاطر عيون منتدى الصناعات الكيمياوية